काठमाडौँ, २६ साउन । ‘निष्क्रिय’ प्रहरी कुकुर वितरणका निम्ति आवेदन आह्वान गरिएको छ ।
नेपाल प्रहरी केनाइन कार्यालयले यही साउन २१ गते सूचना प्रकाशन गर्दै सात दिनभित्र निवेदन पेस गर्न भनेको हो ।
“…नेपाल प्रहरी केनाइन कार्यालय, महाराजगन्जमा सेवारत तपसिलबमोजिमका निष्क्रिय प्रहरी कुकुरहरू वितरणको प्राथमिकतामा रहेका इच्छुक दाता, बहालवाला एवं पूर्वप्रहरी कर्मचारीहरू र अन्य सर्वसाधारण व्यक्तिहरूलाई वितरण गर्ने व्यवस्था मिलाइएको हुँदा यो सूचना प्रकाशित भएको मितिले ७ (सात) दिनभित्र आवश्यक कागजातसहित सक्कलै निवेदन पेस गर्नुहुन सम्बन्धित सबैको जानकारीको लागि यो सूचना प्रकाशित गरिएको छ,” सूचनामा उल्लेख छ ।
सर्वसाधारण समेतले ती कुकुर किन्न पाउनेछन् । तीन निष्क्रिय प्रहरी कुकुर वितरण गरिने सूचनामा उल्लेख छ ।
बिजुली नाम राखिएको पोथी जर्मन शेफर्ड वितरण सूचीको पहिलो नम्बरमा छ । आठ वर्षको यो कुकुर खोजी तथा उद्धारमा समेत सहयोगी हुनेछ । यसको मूल्य पाँच हजार रुपैयाँ तोकिएको छ । वितरण सूचीको दोस्रो नम्बरमा मोती नामको गोल्डेन रिट्रिभर भाले कुकुर छ । ११ वर्ष उमेर भनिएको यो कुकुर लागुऔषध खोजी र एवं पहिचानमा समेत सहयोगी हुनेछ । यसको मूल्य चार हजार रुपैयाँ तोकिएको छ ।
म्याक नाम राखिएको अर्को भाले जर्मन शेफर्ड वितरण सूचीको तेस्रो नम्बरमा छ । नौ वर्षको यो कुकुर विस्फोटक पदार्थ खोजी एवं पहिचानमा समेत सहयोग हुनेछ । यसको मूल्य चार हजार ५०० रुपैयाँ तोकिएको छ ।
कुकुर प्राप्त गर्न चाहनेले निवेदनका साथ विभिन्न कागजात पेस गर्नुपर्ने प्रहरीले जनाएको छ ।
