एजेन्सी, १८ बैशाख । इरानले अमेरिकाविरुद्ध कडा चेतावनी दिँदै पुनः सैन्य आक्रमण गरिए लामो र पीडादायी प्रहार गरिने बताएको छ । यो चेतावनीले स्ट्रेट अफ होर्मुज क्षेत्रमा बढ्दो तनावलाई अझ जटिल बनाएको छ ।
रोयटर्सका अनुसार अमेरिका–इजरायल र इरानबिच दुई महिना लामो द्वन्द्वपछि पनि उक्त समुद्री मार्ग पूर्ण रूपमा खुल्न सकेको छैन । अप्रिल ८ देखि युद्धविराम लागू भए पनि, इरानले आफ्ना तेल निर्यातमाथि अमेरिकी नौसैनिक नाकाबन्दीको प्रतिक्रिया स्वरूप स्ट्रेट बन्द राखेको छ ।
ओरिकी राष्ट्रपति डोनाल्ड ट्रम्पले बिहीबार इरानलाई वार्तामा ल्याउन थप सैन्य कारबाहीका विकल्पबारे जानकारी लिन तय गरेको बताइएको छ । यो खबर सार्वजनिक भएपछि अन्तर्राष्ट्रिय तेल बजारमा तीव्र उतारचढाव देखिएको थियो । ब्रेन्ट क्रूड तेलको मूल्य बिहीबार एक समय प्रति ब्यारेल १२६ डलरसम्म पुगेको थियो । तर पछि बजार बन्द हुँदा यो ११४ डलर आसपास स्थिर भयो । इरानका विदेश मन्त्रालयका प्रवक्ता इस्माइल बगाईले छोटो समयमा समाधानको अपेक्षा गर्नु अव्यावहारिक हुने बताएका छन् । उनका अनुसार कुनै पनि मध्यस्थकर्ता भए पनि छिट्टै परिणाम आउने आशा गर्नु यथार्थपरक छैन ।
यसैबीच, राजधानी तेहरानका केही क्षेत्रमा वायु प्रतिरक्षा प्रणाली सक्रिय गरिएको आवाज सुनिएको इरानी सञ्चारमाध्यमहरूले जनाएका छन् । मेहर न्यूज एजेन्सी र तास्निम न्यूज एजेन्सीका अनुसार, साना ड्रोन र निगरानी विमानहरू विरुद्ध प्रतिरक्षा प्रणाली प्रयोग गरिएको थियो । क्षेत्रीय सुरक्षा चिन्ताबिच संयुक्त अरब इमिरेट्सले बिहीबार आफ्ना नागरिकलाई इरान, लेबनान र इराक यात्रा नगर्न निर्देशन दिएको छ । त्यहाँ रहेका नागरिकलाई तत्काल स्वदेश फर्कन पनि आग्रह गरिएको छ ।
