काठमाडौँ, २ साउन । आन्तरिक राजस्व कार्यालय झापाको भद्रपुरले आर्थिक वर्ष २०८०/८१ मा तीन अर्ब २१ करोड १२ लाख ६७ हजार राजस्व संकलन गरेको छ ।
कार्यालयले गत असारमा मात्र ३० करोड ७१ लाख नौ हजार राजस्व संकलन गरेको हो । कार्यालयले आव २०७९/८० को तुलनामा १९ करोड ५२ लाख ९१ हजार बढी राजस्व संकलन गरेको छ । गत आवमा तीन अर्ब एक करोड ५९ लाख ७६ हजार राजस्व संकलन भएको आन्तरिक राजस्व कार्यालय भद्रपुरका जनाएको छ । गत आवमा कार्यालयको तीन अर्ब ७९ करोड ७१ लाख राजस्व उठाउने लक्ष्य थियो । तर, ८४.५७ प्रतिशतमात्र राजस्व संकलन गर्न सकिएको छ ।
आन्तरिक राजस्व कार्यालयले आयकरबाट एक अर्ब ६९ करोड ९४ लाख, भाडा आयकरबाट तीन करोड ६४ लाख, ब्याजबापत ११ करोड ५९ लाख, मूल्य अभिवृद्धि करबापत एक अर्ब २९ करोड पाँच लाख लाख तथा अन्तःशुल्कबापत ६४ करोड ४६ लाख ५५ हजार राजस्व संकलन गरेको हो ।
