काठमाडौँ, २८ जेठ । नेपाली कांग्रेसका नेता डा. शेखर कोइरालाले राजनीतिक स्थिरताका निम्ति लोकतान्त्रवादी शक्तिले सोच्ने बेला आएको बताएका छन् ।
आज कांग्रेस नेत्री शैलजा आचार्यको १५औँ स्मृति दिवसका अवसरमा काठमाडौँमा आयोजित कार्यक्रममा बोल्दै उनले डेढ वर्षमा प्रदेश र केन्द्र गरेर २३ पटक सरकार परिवर्तन भएको उनले उल्लेख गरे । उनले ‘अझै कतिपटक सरकार परिवर्तन हुने ?’ भन्दै प्रश्न गरे ।
उनले देशमा सुशासनको अभाव र भ्रष्टाचारले गाँजेको बताए । “राजनीतिक स्थायित्व, सरकारको स्थायित्व छैन । आर्थिक विकास हुन सक्ने अवस्था छैन । सुशासन छैन, भ्रष्टाचारले गाँजेको छ,” उनले भने । कांग्रेसको पुरानै साख फर्काउनुपर्ने भन्दै उनले थपे, “बीपी, शैलजालगायत नेता सम्झेर काम गरे कांग्रेसलाई पुरानै अवस्थामा फर्काउन सक्छौँ ।”
