काठमाडौँ, १९ साउन । लुम्बिनी प्रदेशका मुख्यमन्त्री चेतनारायण आचार्यले युवालाई सचेत, अनुशासित र जिम्मेवार बनाउन सके सवारी दुर्घटनामा उल्लेख्य कमी ल्याउन सकिने बताएका छन् ।
आज दाङको लमहीमा आयोजित प्रदेशस्तरीय सडक सुरक्षा सम्बन्धी कार्यशाला गोष्ठीलाई सम्बोधन गर्दै मुख्यमन्त्री आचार्यले लुम्बिनी प्रदेशमा सबैभन्दा बढी मोटरसाइकल दुर्घटना हुने गरेको र त्यसमा विशेषगरी १६ देखि ३० वर्ष उमेर समूहका युवाको संलग्नता तथा क्षति बढी देखिएको बताए ।
उनले यसलाई प्रदेशकै ठुलो चुनौती र चिन्ताको विषयका रूपमा उल्लेख गरे । त्यस्तै उनले विद्यालय तहदेखि नै सडक सुरक्षा सम्बन्धी सचेतना र अभिमुखीकरण कार्यक्रम सञ्चालन गर्नुपर्ने आवश्यकता औँल्याए । संघ, प्रदेश र स्थानीय तहबीच समन्वय तथा सहकार्य गरी युवालाई सडक सुरक्षासम्बन्धी प्रशिक्षण दिँदै अनुशासित र जिम्मेवार बनाउनुपर्ने उनको भनाइ थियो ।
प्रदेश सरकारले सडक सुरक्षा र दुर्घटना न्यूनीकरणका लागि आवश्यक साझेदारी गर्न तयार रहेको पनि उनले बताए ।
