काठमाडौँ, २० साउन । किर्ते तथा दोहोरो नागरिकता प्रयोग गरेको अरोपमा एकजनालाई प्रहरीले पक्राउ गरेको छ ।
जिल्ला प्रहरी कार्यालय मकवानपुरको टोलीले आज सुजन भनेर चिनिने उमेश भोम्जनलाई पक्राउ गरेको हो । विभिन्न आपराधिक गतिविधिमा फरक–फरक नागरिकता प्रयोग भएको खुलेपछि उमेश पक्राउ परेका हुन् ।
प्रहरीको अनुसन्धानका क्रममा उमेशले पहिलो नागरिकता २०६९ साउनमा जिल्ला प्रशासन कार्यालय मकवानपुरमा स्थायी ठेगाना बकैया गाउँपालिका भएको कागजातका आधारमा सुजन भोम्जनको नामबाट लिएको खुलेको छ ।
पछि उनले फेरि २०७५ सालमै पुरानै स्थायी ठेगानाबाट आमाबुबाको नाम फरक राखेर उमेश भोम्जनको नामबाट नागरिकता लिएको खुलेको हो ।
उनीसित सुजन र उमेश फरक–फरक नामका नागरिकता भएको पुष्टिपछि पक्राउ गरेको प्रहरीले जनाएको छ । दुवै नागरिकताका आधारमा उनीविरुद्ध मुद्दा चलेको समेत फेला परेको छ ।
केही समय अघिमात्रै बौद्धको जंगलमा जुवा खेलीरहेको अवस्थामा नेपाली सेनाको टोलीले नियन्त्रणमा लिएका समूहमा उनीसमेत थिए ।
प्रहरीले नागरिकता ऐन सम्बन्धी कसुरमा अनुसन्धान अघि बढाएको छ ।
