काठमाडौँ, २५ असार । लामखुट्टेको टोकाइबाट लाग्ने रोगका बिरामी हिमाली जिल्लामा पनि भेटिन थालेका छन् ।
लामखुट्टेको टोकाइबाट लाग्ने रोग डेंगी, औलो र कालाजारका बिरामी कालीकोटमा भेटिन थालेका हुन् । विगतमा तराई र पहाडका जिल्लामा मात्र देखिने गरेको लामखुट्टेका कारणले लाग्ने रोग केही वर्षयता हिमाली भूभागमा देखिन थालेको छ । कालीकोटमा आर्थिक २०८२/८३ मा लामखुट्टेको टोकाइबाट लाग्ने डेंगी, औलो र कालाजारका १९ बिरामी भेटिएका जिल्ला स्वास्थ्य सेवा कार्यालयका जनस्वास्थ्य अधिकृत कटकबहादुर महतले जानकारी दिए । डेंगीका १०, कालाजारका आठ र औलोका एक बिरामी भेटिएका उनले बताए ।
जिल्लाका नौ मध्ये ६ पालिकामा डेंगी, औलो र कालाजारका बिरामी भेटिएका जनस्वास्थ्य अधिकृत महतले उल्लेख गरे ।
जिल्लामा डेंगी, औलो र कालाजारका बिरामी भेटिन थालेपछि महामारीको रूपमा फैलन नदिनका निम्ति स्वास्थ्य संस्थासँग समन्वय गरेर लामखुट्टेको लार्भा खोज्ने र नष्ट गर्ने अभियान सुरु गरिएको जिल्ला स्वास्थ्य कार्यालयका महामारी रोग नियन्त्रण शाखाका प्रमुख हेमराज बमले बताए ।
