काठमाडौँ, ५ बैशाख । नवलपरासी (बर्दघाट सुस्ता पूर्व)को देवचुली नगरपालिका–१६, फारमस्थित पूर्व–पश्चिम राजमार्गमा जेसीबी र कार ठोक्किँदा एकै ५ जना घाइते भएका छन् ।
प्रहरीका अनुसार आज दिउँसो झरही खोलाबाट रजहरतर्फ जाँदै गरेको ‘अनटेस्ट’ जेसीबीमा सोही दिशा हुँदै नारायणगढबाट बुटवलतर्फ गइरहेको बा१८च ३३२३ नम्बरको कार ठोक्किँदा दुर्घटना भएको थियो ।
दुर्घटनामा एकै परिवारका कारका चालक रुपन्देहीको बुटवल उपमहानगरपालिका–११ का ३४ वर्षीय सागर ज्ञवाली, उनकी श्रीमती ३१ वर्षीया अन्सु पौडेल, छोरा तीन वर्षीय आयान, नौ महिनाका वेदाक्ष र आमा ५६ वर्षीया कमला ज्ञवाली घाइते भएका हुन् । मोटरसाइकललाई जोगाउन खोज्दा कार जेसीबीमा ठोक्किएको थियो ।
घाइतेहरूलाई उपचारका निम्ति नयाँ मेडिकल कलेज चितवन पठाइएको छ । उक्त दुर्घटनाबारे थप अनुसन्धान भइरहेको प्रहरीले जनाएको छ ।
