हामी देशको मेरुदण्ड बलियो पार्न
दिनरात आफ्ना करङगहरु घोट्छौँ,
उनीहरु आफ्नो मेरुदण्ड बलियो पार्न
देशका करङ्गहरु घोट्छन्, !
अचेल शहरभरीका मान्छेहरु
बाजेको सेकुवाकै ढोल पिटीरहेछन्,
र त गोधुली साँझ हुनेबित्तिकै
हाउसफुल हुन्छ बाजेको सेकुवा कर्नर !
अचेल एकथरी मान्छेहरु
भोको बच्चाले आमाको दूध चुसेझैँ
दिनभर चुस्छन् – देशको रगत !
साँझ परेपछि सितन बनाएर देशको मुटु
रक्सिको मातसँगै कर्नरको एउटा कर्नरबाट
हेर्छन् नवयौवना नर्तकिहरुको नाङ्गोनाच
र खुलेआम बलत्कार गर्छन् !
एतिखेर बाजेको सेकुवा कर्नरको
कर्नर कर्नरमा रङ्गमन्च सुरु भएको छ !
कतै कोकाकोला र ह्वीस्किको झोल पिएर
कोहि वान्ता गरिरहेछ क्यालकुलेट गरिगरि
जनताको मत र पसिनाको हिसाब !
कतै आवेगको धुवाँ उडाएर फँस्फसी
कोहि बार्गेनिङ गरिरहेछ जबर्जस्त
राममायाका मस्त जवानीहरु !
कतै निगमको खोल ओडेर
कोहि भाषण छाँटिरहेछ, अन्धराष्ट्रवाद, ईश्वरवाद र
लम्पसारवादका झुटा
पर्चाहरु !
कतै सपनाहरुको बिस्कुन फिँजाएर टेबलमा
बैठक बसिरहेछन् गुप्तचर निकायझैँ
लागुऔषध,दुर्व्यसनी र चेलिबेटी
बेचबिखनका हिमायतिहरु !
कतै बडो उर्जाका साथ गीत गाएर
कुनै तस्करझैँ जानी नजानी नाचिरहेछन्
दलाल राज्यसत्ताका प्रशासनिक स्तम्भहरु !
कतै घ्याम्पाजत्रो आफ्नो पेट सुम्सुम्याउँदै
भोको कुकुरझैँ र्याल काडिरहेछ्न् ,
कर्पोरेट हाउस र बहुराष्ट्रीय कम्पनिहरु !
त्यही कर्नरको पछाडि
एउटा कर्नरमा बृहत् मिटिङ छ ,
सत्ताधारी यो देशका अंशियारहरुको !
कुकिङमा व्यस्त देखिन्छन् तिनिहरुकै सेवारत
यो देशका राष्ट्रीय पुँजीपति वर्गहरु !
सेकुवा कर्नरको बाहिर पेटिमा निदाएको म
यो कस्तो सपना देखिरहेछु भगवान् !
टुँडिखेलको बिचमा उभिएर
चङ्गामा देश उडाइरहेको मेरो छोरोको हातमा
एतिखेर लट्टाइ मात्र बाँकी छ !
रङ्गमञ्च सकिनै लाग्दा प्रबेश गरेका छन्
केही राजदुतावासका उच्चपदस्थ अधिकारिहरु !
थाहा छैन भोलि देशको कुन हालतलाई
कस्तो टाइटलमा समेट्ने हुन् राष्ट्रीय दैनिकहरुले !
अचेल यो शहरभरीका मान्छे
किन एति बिघ्न
बाजेको सेकुवाकै ढोल पिटीरहेछन् ?
हामीहरु देश बँचाउन देशलाई
आफ्नो बलिदानको रगत पिलाउँछौ,
उनीहरु आफुलाई जिवित भएको नाटक गर्न
देशको रगत बेचेर रम र ह्वीस्किको चुस्की लिन्छन् !
अब तपाईं आफैं भन्नोस्
आज यो देशको सरकार
र बाजेको सेकुवा कर्नरमा के फरक छ ?
अचेल राजधानीभित्र, बाहिर वा देशैभरी
हरेक दिन गोधुली साँझको पहिलो प्रहरमै
टार्गेट बनाएर बाजेको सेकुवा कर्नरस
भेला हुन्छन् माथी उल्लेखित मान्छेहरु
र कर्नरको कर्नर कर्नरमा उसैगरी
रङ्गमञ्चको सुरुवात हुन्छ !
हो कम्रेडहरु,
मलाई यो बाजेको सेकुवा कर्नर
र यो देशको राज्यसत्ता उस्तै लाग्छ !
त्यसैले आउनोस् ध्वस्त गराऊँ यो फेमस कर्नर
र गाडेर सोही ठाउँमा समाजवादको लालझण्डा
यो देशलाई समाजवादी राष्ट्र घोषणा गरौँ !
लालसलाम !…लालसलाम !…फेरि लालसलाम !
बि .एन ढकाल
अरुण गाउँपालिका – ५, भोजपुर।
हाल : काठमाण्डौ ।
