(जेष्ठ १९, काठमाडौं) । नेपाल कम्युनिष्ट पार्टीका अध्यक्ष तथा प्रधानमन्त्री केपी ओलीले नेपाल र सुखी बनेसँगै कलाकारहरुले निराशाका गीत गाउनु नपर्ने बताएका छन् ।
साँस्कृतिक संस्थानले आज आयोजना गरेको जनगायक रामेश श्रेष्ठको अभिनन्दन कार्यक्रममा बोल्दै प्रधानमन्त्री ओलीले निरंकुशताबिरुद्ध जनता जगाउन रामेशले गाएका गीतले महत्वपूर्ण भूमिका निर्वाह गरेको समेत प्रधानमन्त्री ओलीले बताए । रामेशहरुले दर्शकका लागि गाएको गीतले सार्थकता पाउँदै सबैको योगदानले देशमा परिवर्तन आएको प्रधानमन्त्री ओलीले बताए ।
कुनैबेला जनता जगाउन गाउँ–गाउँबाट उठ, बस्ती बस्तीबाट उठ बोलको गीत रचना गरेका र गाएका कलाकारलाई त्यस गीतका अरु भागहरु रचना गर्न र गाउन आग्रह गर्दै प्रम ओलीले भने ‘आज देश निर्माण गर्ने सन्दर्भमा यो गीतको नयाँ भाग ल्याएर जनतालाई फेरि जगाउनुहोस ।’
कार्यक्रममा प्रधानमन्त्री ओलीलगायत उपप्रधान तथा रक्षामन्त्री ईश्वर पोख्रेल, पूर्व प्रधानमन्त्री झलनाथ खनाल र मन्त्रीहरुले गायक रामेशलाई गीत संगीतको क्षेत्रमा नेपाली समाजलाई अतुलनीय योगदान पुर्याएकोमा अभिनन्दन गरेका थिए ।
