वीरगञ्ज, १८ माघ । वीरगञ्ज-८ स्थित नगर विकास समितिको भवनमा रहेको मुक्तिनाथ बिकास बैंकको शाखा कार्यालयमा आगलागी भएको छ ।
गएराति ११ बजेतिर आगलागी भएको हो । आगलागीबाट बैंकभित्र रहेको एक दर्जन कम्युटर, प्रिन्टर ३ थान, २ सेट सोफा, ४ थान एसी, फर्निचरलगायतका समान र कागजपत्र जलेर नष्ट भएको शाखा कार्यालयका म्यानेजर अशोक राजभण्डारीले जानकारी दिनुभयो । उहाँका अनुसार महत्वपूर्ण कागजात र रकम भने सुरक्षित छ ।
वडा प्रहरी कार्यालय विर्ताका प्रहरी निरीक्षक निर्मल पनेरुले १५ लाख मूल्य बराबरको क्षति भएको अनुमान गरिएको र यकिन विवरण संकलन भइरहेको जानकारी दिनुभयो । विद्युत सर्ट भएर आगलागी भएको हुन सक्ने अनुमान प्रहरीले गरेको छ ।
