काठमाडौँ, ७ पौष । काठमाडौँको सुकेधारामा बसको ठक्करबाट चाबहिलस्थित पशुपति क्याम्पसमा अध्ययनरत गोरखाकी २२ वर्षीया सृष्टि पन्त घाइते भएकी छिन् ।
सोमबार विहान बा ५ ख ५९३० नम्बरको यात्रुबाहक बसले बीबीएस चौथो वर्षमा अध्ययनरत विद्यार्थी पन्तलाई ठक्कर दिएको थियो । बसको ठक्करबाट घाइते पन्तको ओम अस्पतालमा उपचार भइरहेको प्रहरीले जनाएको छ ।
पन्तलाई ठक्कर दिएर बस भागेपछि पशुपति क्याम्पसका विद्यार्थीहरुले चाबहिल क्षेत्रमा अन्य गाडीमा तोडफोड र आगजनी गरेका छन् । ठक्कर दिने गाडी र चालकलाई भने प्रहरीले नियन्त्रणमा लिएको छ । आक्रोशित विद्यार्थी तोडफोडमा उत्रिन थालेपछि स्थितिलाई नियन्त्रण लिन अहिले पशुपति क्याम्पस वरपर ठूलो संख्यामा प्रहरी परिचालन गरिएको छ ।
