काठमाडौँ, ६ असोज । भक्तपुरको चाँगुनारायण नगरपालिका–०२ दुवाकोटमा मोटरसाइकलको ठक्करबाट अन्दाजी ६५ वर्षीय पुरुष पैदलयात्रीको मृत्यु भएको छ ।
प्रहरीका अनुसार आज के.एम.सी. अस्पतालबाट महाकालचोकतर्फ जाँदै गरेको कर्णाली प्रदेश ०२-००३ प ३७०७ नम्बरको मोटरसाइकलले दुवाकोटस्थित सिटी ब्याङ्केट नजिक पैदलयात्रीलाई ठक्कर दिँदा घाइते भएका थिए ।
घाइतेलाई उपचारका लागि के.एम.सी. अस्पताल लगिएकोमा उपचारकै क्रममा मृत्यु भएको हो । दुर्घटनामा मोटरसाइकल अनियन्त्रित भई सोही स्थानमा रोकिराखेको बा.२१ च ५६७४ नम्बरको कारलाई समेत ठक्कर दिँदा कारको अगाडिको भागमा क्षति पुगेको छ ।
दुर्घटनामा संलग्न मोटरसाइकल चालक जुम्ला हिमा गाउँपालिका–५ घर भई हाल सृजनानगर बस्ने २० वर्षीय दिपेन्द्र शाहीलाई नियन्त्रणमा लिएको र दुर्घटना सम्बन्धमा थप अनुसन्धान भइरहेको प्रहरीले जनाएको छ ।
