काठमाडौँ, २० भदौ । पूर्वप्रधानमन्त्री पुष्पकमल दाहाल ‘प्रचण्ड’ ले कर्मचारीलाई अनुशासित, कर्तव्यनिष्ठ र जिम्मेवार बनाउने नाममा उनीहरूमाथि कुनै किसिमको जबरजस्ती वा दबाब दिन नहुने बताएका छन् ।
निजामती सेवा दिवस–२०८३ को अवसरमा शनिबार काठमाडौँमा आयोजित निजामती कर्मचारी सम्मान कार्यक्रमलाई सम्बोधन गर्दै उनले कर्मचारीले संविधान र कानुनको सीमाभित्र रहेर निष्पक्ष, जिम्मेवार र जनमुखी ढङ्गले काम गर्नुपर्नेमा जोड दिए ।
उनले देशको वर्तमान अवस्थाप्रति सङ्केत गर्दै अहिले सबैका लागि राष्ट्र नै सर्वोपरि रहेको बताए । राष्ट्र, जनता र लोकतन्त्रप्रतिको प्रतिबद्धता हरेक व्यक्ति र संस्थामा आवश्यक रहेको उल्लेख गर्दै उनले राज्यका सबै संयन्त्रले संविधान, कानुन र जनताको हितलाई सर्वोच्च प्राथमिकतामा राखेर काम गर्नुपर्ने धारणा राखे ।
