काठमाडौँ, १० पौष । नेपाल कम्युनिष्ट पार्टी (नेकपा)का अध्यक्ष तथा प्रधानमन्त्री केपी शर्मा ओलीले जनताले देश विकास तथा समृद्धिको जिम्मा जनप्रतिनिधिको काँधमा लगाइदिएकाले विकास निर्माणको कार्यमा सानातिना कुरामा अल्झीनु नहुने बताउनुभएको छ ।
राष्ट्रिय जनता पार्टीका नेतासँग आज बालुवाटारमा भएको छलफलमा प्रधानमन्त्री ओलीले मधेशका समस्या समाधान गर्न आफू सकारात्मक रहेको बताउनुँदै मधेशको सामाजिक विकास, समृद्धि र त्यहाँका सबै प्रकारका समस्या समाधान गर्न म सकारात्मक रहेको बताउनुभयो ।
प्रधानमन्त्री ओलीले चार पार्टीलाई जनताको जनमतद्वारा राष्ट्रिय पार्टीको मान्यता दिएसँगै जनताले देश निर्माणको जिम्मा दिएकाले सबैले आ–आफ्नो जिम्मेवारी पूरा गर्नुपर्नेमा जोड दिनुभयो । उहाँले कुनै पनि कुरालाई विगतको कुरा तथा कामको आधारमा सोच्नुभन्दा पनि आगामी दिनमा नयाँ ढंगले गर्नुपर्नेमा जोड दिनुभयो ।
