काठमाडौँ, २४ बैशाख । काभ्रेपलाञ्चोकस्थित बीपी राजमार्ग पुनः सञ्चालनमा ल्याइएको छ ।
वर्षासँगै रोशी खोलामा बहाव बढेपछि यही वैशाख २१ गते अपराह्नदेखि बीपी राजमार्गमा सवारी आवागमन बन्द गरिएको थियो ।
रोशी गाउँपालिका–७, घुमाउनेनजिक बाढीले बगाएको ‘डाइभर्सन’ मर्मत गरी बिहीबार (वैशाख २४) बिहानदेखि बाटो खुलाइएको जिल्ला प्रहरी कार्यालय काभ्रेले जनाएको छ ।
“बीपी राजमार्गमा बगाएको डाइभर्सन मर्मत गरी हाललाई बाटो सुचारु गरिएको हुनाले लेन अनुशासन कायम गरी ट्राफिक नियम पालना गरी सावधानीपूर्वक यात्रा गर्नुहुन हार्दिक अनुरोध गर्दछौँ,” प्रहरीले जारी गरेको सूचनामा उल्लेख छ ।
