काठमाडौँ, १८ बैशाख । पोखराको फेवातालमा पौडी खेल्ने क्रममा डुबेर एक बालकको मृत्यु भएको छ ।
प्रहरीका अनुसार आज बिहान ११ः१५ बजे पोखरा १८ खपौदीस्थित फेवातालमा पौडी खेल्ने क्रममा बेपत्ता भएका १० वर्षीय आरेस लामाको मृत्यु भएको हो । लामा खपौदीकै हुन् ।
सशस्त्र प्रहरी नायव निरीक्षक ताराचन्द्र शर्माको कमान्डमा सातजनाको गोताखोरसहितको टोली घटनास्थलमा पुगेर खोजी गरेको थियो । गोताखोरले १८ फिट गहिराइबाट बालकलाई अचेत अवस्थामा बाहिर निकालेका थिए ।
उनलाई तत्काल उपचारका लागि पश्चिम क्षेत्रीय गण्डकी अस्पताल, पोखरा १० रामघाट पठाइएकोमा उपचारको क्रममा आज दिउँसो चिकित्सकले मृत घोषणा गरेका थिए ।
