भक्तपुर, १९ मङ्सिर । बालकोटको एकमात्र तर अव्वल सामुदायीक महेन्द्र शान्ति माविले विगत केही समयदेखि विद्यार्थीलाई विभिन्न कृयाकलापमा सकृय बनाउँदै आएको छ ।
विद्यालयको वार्षिक तालीका अनुसार वार्षिक वनभोज अर्थात पिकनिकका लागि सो विद्यालयमा अध्ययनरत विद्यार्थीहरुलाई चोभारस्थित महामञ्जुश्रीले खड्गले काटेको ऐतिहासिक डाँडामा लगिएको विद्यालयका प्रधानाध्यापक गोपाल विक्रम थापाले बताउनुभयो ।
चोभारस्थित जलविनायक मन्दीर दर्शन गराउनुको साथै त्यहाँ नजिक रहेको हुपिल्याण्ड फन पार्कमा विद्यार्थीहरुलाई सहभागी गराई धार्मिक र मनोरञ्जन कार्यमा समेत सहभागी गराइएको थियो ।
यसका साथै विद्यार्थीदेखि शिक्षकहरुलाई सहभागी गराई म्युजिकल चेयरदेखि विभिन्न १७ थरीका कृयाकलाप गराई विजेतालाई पुरस्कार समेत दिइएको थियो ।
महेन्द्र शान्ति मावि विद्यालय व्यवस्थापन समितिका निवर्तमान अध्यक्ष एवम् ५ लाख रुपैयाँको छात्रवृत्ति कोषका संस्थापक हेमन्त कुमार कार्की तथा प्रधानाध्यापक थापाले विजयीहरुलाई पुरस्कार प्रदान गर्नुभयो ।
