काठमाडौँ, ५ असोज । पाठेघरको मुखको क्यान्सर गराउने ह्युमन प्यापिलोमा भाइरस एचपीभीविरुद्धको डेमोस्ट्रेसन खोप अन्तिम दिन आज पनि दिइँदै छ । सरकारले भदौ २७ गतेबाट सुरु गरेको यो खोप १४ वर्ष पूरा भइ १५ नकटेका किशोरीलाई दिइएको हो ।
भदौ २७ गतेदेखि सुरु भएको खोप कार्यक्रमको तालिका यसअघि ३१ गतेसम्म भए पनि म्याद थप गरी असोज ५ गतेसम्म दिन लागिएको हो । अन्तिम दिन शुक्रबार (आज) कोसी अस्पताल बिराटनगर, नारायणी अस्पताल वीरगञ्ज, परोपकार प्रसुति गृह थापाथली, पोखरा स्वास्थ्य विज्ञान प्रतिष्ठान, भेरी अस्पताल नेपालगञ्ज, प्रदेश अस्पताल वीरेन्द्रनगर र डडेलधुरा अस्पतालबाट दिइरहेको स्वास्थ्य तथा जनसंख्या मन्त्रालयले जनाएको छ ।
एचपीभी एक प्रकारको जीवाणु हो । विभिन्न देशहरूमा गरिएको अध्ययन अनुसार पाठेघरको मुखको क्यान्सरको प्रमुख कारक तत्व एचपीभी हो । पाठेघरको मुखको क्यान्सर मध्ये ९५ प्रतिशत एचपीभीले गराउँछ । यो जिवाणुका दुईसय बढी प्रजाति हुन्छन्, तिमध्ये १६ र १८ प्रजाति क्यान्सरका प्रमुख कारक हुन् ।
