काठमाडौँ, ११ साउन । प्रभु बैंकले साउन १९ गतेबाट ऋणपत्र निष्कासन गर्ने भएको छ । बैंकहरूले एक हजार अंकित दरको दुई अर्ब रुपैयाँबराबरको २० लाख कित्ता ऋणपत्र निष्कासन गर्न लागेको हो ।
बैंकले एक अर्ब २० करोडबराबरको १२ लाख कित्ता ऋणपत्र विभिन्न व्यक्ति तथा संघ–संस्थालाई व्यक्तिगत तवरबाट बिक्री गर्ने बैंकले जनाएको छ । यस्तै बाँकी रहेको ८० करोड रुपैयाँबराबरको आठ लाख कित्ता ऋणपत्रको ५ प्रतिशत अर्थात् ४० हजार कित्ता सामूहिक लगानी कोषलाई छुट्याएको र बाँकी रहेको ७ लाख ६० हजार कित्तामा भने सर्वसाधरणले आवेदन दिन सक्नेछन् ।
आठ वर्ष अवधि रहेको ऋणपत्रको ब्याजदर १० प्रतिशत छ । ऋणपत्रको ब्याज त्रैमासिक रूपमा भुक्तानी हुने बैंकले जनाएको छ । सर्वसाधारणले न्यूनतम २५ कित्तादेखि अधिकतम तीन लाख कित्तासम्मका लागि आवेदन दिने सक्नेछन् ।
लगानीकर्ताले छिटोमा साउन २३ गते र उक्त समयमा पर्याप्त आवेदन नपरेमा भदौ १ गतेसम्म आवेदन दिन सक्नेछन् । बैंकको ऋणपत्र निष्कासन तथा बिक्री प्रबन्धकमा नबिल इनभेष्टमेन्ट बैंकिङ छ ।
