एजेन्सी, २१ कार्तिक । इरानको केशम टापुमा दुईवटा मिसाइल खसेका छन् । यसैबीच इरानी सेनाले टापुको आकाशमा उडिरहेको अमेरिकी एमक्यू–९ ड्रोन खसालेको दाबी गरेको छ ।
इरानी समाचार संस्था तस्निमले प्रारम्भिक विवरण उद्धृत गर्दै केशम टापुमा दुईवटा मिसाइल खसेको जनाएको छ । इरानको सरकारी समाचार संस्था इर्नाका अनुसार विमानको आवाज सुनिएपछि टापुको सोजा क्षेत्रमा दुईवटा प्रक्षेप्य खसेका थिए । घटनाबाट भएको सम्भावित क्षतिबारे भने आधिकारिक विवरण सार्वजनिक गरिएको छैन ।
यसैबीच, समाचार संस्था रोयटर्सले इरानी सरकारी सञ्चारमाध्यमलाई उद्धृत गर्दै इरानी सेनाले केशम टापुमाथि उडिरहेको अमेरिकी एमक्यू–९ ड्रोन खसालेको दाबी गरेको जनाएको छ।
यद्यपि, अमेरिकी ड्रोन खसालिएको घटनाको स्वतन्त्र पुष्टि हुन सकेको छैन । त्यस्तै, टापुमा दुईवटा मिसाइल खसेको र ड्रोन खसालिएको घटनाबीच कुनै सम्बन्ध रहे–नरहेको पनि स्पष्ट भएको छैन ।
