काठमाडौँ, १२ जेठ । हावाहुरी, वर्षा र चट्याङका कारण मोरङको विराटनगरका धेरै स्थानमा विद्युत् आपूर्ति अवरुद्ध भएको छ ।
विद्युत् आपूर्ति अवरुद्ध भएको साढे १२ घण्टाभन्दा बढी समय भइसकेको स्थानीयले बताएका छन् । सोमबारको हावाहुरी र वर्षाका कारण ३३ केभी विराटनगर ३, मल्टिफ्युल, कटहरी र विराटनगर औद्योगिक फिडरमा अहिले पनि ‘फल्ट’ देखिएको नेपाल विद्युत् प्राधिकारणले जनाएको छ ।
प्राधिकरणका अनुसार, धेरै ठाउँमा विद्युत् पोल भाँचिएको छ । रुख ढल्दा तार चुँडिएको छ । क्षति भएको ठाउँमा प्राधिकरणका प्राविधिक तथा कर्मचारी खटिएर मर्मत कार्य सुरु भइसकेको जनाइएको छ ।
तर, पूर्ण रूपमा मर्मतसम्हारको कार्य पूरा नहुन्जेल धेरै स्थानमा बिजुली आपूर्तिको सम्भावना न्यून रहेको प्राधिकरणको विराटनगर कार्यालयले जनाएको छ ।
