काठमाडौँ, २० बैशाख । चितवनको मुग्लिन–नारायणगढ सडकखण्डस्थित तुइन खोला पुलनजिकै बाटो पुनः दुईतर्फी सञ्चालनमा ल्याइएको छ ।
आज बिहान करिब ६ बजेतिर पहिरो खस्दा उक्त स्थानमा सडक अवरुद्ध भएको थियो । सुरुमा इलाका प्रहरी कार्यालय मुग्लिनबाट खटिएको टोलीले साबेललगायत औजारको प्रयोग गरी बाटो एकतर्फी खुलाएको थियो । अलि ठूला ढुंगा हटाउन नसकेपछि प्रहरीले सडक डिभिजन भरतपुरलाई जानकारी गराएको थियो ।
त्यसपछि मेसिनको सहायतामा बिहान करिब साढे ९ बजेतिर बाटो दुईतर्फी सञ्चालनमा ल्याइएको सडक डिभिजनले जनाएको छ । “मुग्लिन–नारायणगढ सडकखण्डको तुइन खोलानजिकै माथिबाट ढुंगाहरू झर्दा एकतर्फी सञ्चालनमा रहेको सडक हाल दुवैतर्फ सञ्चालनमा आएको जानकारी गराउँदछौँ,” सडक डिभिजनको सूचनामा उल्लेख छ ।
