काठमाडौँ, २४ जेठ । राष्ट्रियसभा सदस्य वामदेव गौतमले सरकारले बजेटमा जनताको हितलाई प्राथमिकतामा राख्न नसकेको बताएका छन् ।
आज राष्ट्रियसभाको बैठकमा सरकारले प्रस्तुत गरेको आगामी आर्थिक वर्ष २०८०/०८१ को बजेटबारे छलफलमा भाग लिँदै उनले यस्तो बताएका हुन् ।
उनले भने, ‘कृषि उत्पादन तथा व्यवसायीकरण र औद्योगिकरणको महत्व वर्तमान सरकारले बुझ्न सकेको देखिएन । अहिले यो बजेटमा ४ करोड कित्तामा विभाजित कृषि भूमिलाई अरु तिब्र गतिमा विभाजित गरी ज्यानमारा किसान कित्ताकाटलाई तुरुन्त लागू गर्ने उल्लेख गरिएको छ’ ‘यसले के देखिन्छ भने वर्तमान सरकार आकाश-पातालको कुरा धेरै गर्छ, कुरा जे पनि गर्छ, जनताको हित हुनेकुरा प्राथमिकतामा राख्न सकेको छैन ।’
गौतमले कृषि उत्पादन तथा व्यवसायीकरण र औद्योगिकरण प्राथमिकतामा पर्नुपर्ने बताए । उनले बजेटले कृषि क्षेत्रमा रहेका जनताको दयनीय अवस्था देख्न नसकेको बताए ।
