काठमाडौँ, १२ कार्तिक । झन्डै दुई सातासम्म बक्स अफिसमा दबदबा कायम राखेपछि दक्षिण भारतीय सुपरस्टार रजनीकान्तको फिल्म ‘जेलर २’ को कमाइ ४२३ करोड भारतीय रुपैयाँ पुगेको छ ।
नेल्सन दिलीपकुमारको निर्देशनमा बनेको यस फिल्मले भारतमा ४२३ करोड भारतीय रुपैयाँ कमाएको छ । सिनेमाघरमा दोस्रो साता पूरा गर्दै गर्दा यसको दैनिक सङ्कलनमा भने ठुलो गिरावट देखिएको हो ।
प्रदर्शनको पहिलो दिन ‘जेलर २’ ले भारतभर १५ हजार ८८७ शोहरूबाट ५९ करोड ७० लाख रुपैयाँ खुद सङ्कलन गरेको थियो । प्रदर्शन हुनुभन्दा पाँच दिनअघि अक्टोबर १० देखि भारतमा यसको अग्रिम टिकट बुकिङ खुला गरिएको थियो ।
पहिलो दिनका लागि मात्रै भारतमा १८ लाख टिकट बिक्री भई ३७ करोड रुपैयाँ सङ्कलन भएको थियो । पहिलो साताको कामकाजी दिनहरूमा पनि राम्रो सङ्कलन कायम राख्दै फिल्मले पहिलो सातामै ३३४ करोड ३५ लाख रुपैयाँ कमाएको थियो ।
बक्स अफिस ट्र्याकिङ साइट साकनिल्कका अनुसार ‘जेलर २’ ले हालै ६ करोड ५५ लाख रुपैयाँ मात्र सङ्कलन गरेको छ, जुन प्रदर्शनयताकै सबैभन्दा कम दैनिक कमाइ हो । यसले दुई सातापछि फिल्मको रफ्तार सुस्त भएको सङ्केत गरेको छ । योसँगै फिल्मको कुल भारतीय सङ्कलन ४२३ करोड रुपैयाँ पुगेको छ ।
‘जेलर २’ यस वर्षको दोस्रो धेरै कमाउने भारतीय फिल्म बनेको छ । पहिलो स्थानमा ‘धुरन्धर द रिभेन्ज’ रहेको छ ।
