एजेन्सी, ३१ भदौ । इरानको मशहद विमानस्थलबाट उडान भरेको केही समयमै यात्रुवाहक विमान आपत्कालीन अवतरण गराउनु परेको छ । उडान भर्ने क्रममा विमानको एउटा टायर पड्किएको थियो ।
‘यूओएल’का अनुसार सफरान एयरलाइन्सको बोइङ ७३७ विमानको टायर पड्किएपछि इन्जिनमा समेत क्षति पुगेको थियो । त्यसपछि पाइलटले विमानलाई सुरक्षित रूपमा पुनः मशहद विमानस्थल फर्काएका थिए ।
विमान मशहदबाट केर्मानशाह तर्फ उडेको थियो । विमानमा सवार सबै यात्रुलाई सुरक्षित रूपमा ओरालिएको र कोही पनि घाइते भएको खबर छैन ।
घटना स्थानीय समयअनुसार सेप्टेम्बर १५ को बेलुका ५ः३९ बजे भएको हो । इरानी समाचार एजेन्सी ‘आख्रिन खबर’ले घटनाको भिडियो सार्वजनिक गरेको छ । भिडियोमा अवतरणका क्रममा विमानको छतको भित्री भाग फुटेर यात्रुमाथि खसेको देखिन्छ ।
