काठमाडौँ, ३१ जेठ । ललितपुरमा गोली चलेको छ ।
शनिबार लागुऔषध ‘कारोबारी’ एक नेपाली र दुई भारतीय नागरिकलाई हवाईफायर गरी नियन्त्रणमा लिएको हो ।
पक्राउ पर्नेमा बाराको सिम्रौनगढ नगरपालिका–३ का ३५ वर्षीय जितेन्द्र पासवान, भारतको बिहारका ३२ वर्षीय अहमद लड्न र बिहारकै ३३ वर्षीय महमत सद्दाम छन् ।
प्रहरीले उनीहरूका साथबाट लागुऔषध ट्रामाडोल ३० हजार क्याप्सुल पनि बरामद गरेको छ । सिम्रौनगढबाट काठमाडौँतर्फ आउँदै गरेको वाग्मती प्रदेश बीएडी९२०१ नम्बरको कारबाट उक्त लागुऔषध बरामद गरिएको हो ।
उक्त कार र बा५२प ४५६७ नम्बरको मोटरसाइकलमा उनीहरू सवार थिए । सोहीक्रममा ललितपुर महानगरपालिका–२३, गैरीगाउँबाट नक्खुतर्फ आउँदै गरेको अवस्थामा प्रहरी टोलीले उनीहरूलाई कार र मोटरसाइकल रोक्न भनेको थियो ।
तर, अटेर गरी भाग्दै गरेको अवस्थामा पेस्तोलबाट एक राउन्ड हवाईफायर गरी पक्राउ गरिएको प्रहरीले जनाएको छ ।
त्यसपछि खानतलासी गर्दा कारको पछाडि डिक्कीभित्र लुकाइराखेको अवस्थामा उक्त परिमाणको लागुऔषध ट्रामाडोल भेटिएको हो ।
उनीहरूमाथि थप अनुसन्धान गरिरहेको ब्युरोले जनाएको छ ।
