काठमाडौँ, १६ बैशाख । कांग्रेस सभापति गगनकुमार थापाले आफ्नै बहुमत सरकारको संसद्प्रति नै विश्वास नभएको बताएका छन् ।
आज उनले रौतहटको चन्द्रनिगाहपुरमा पार्टीका स्थानीय नेता, कार्यकर्ताहरूसँग भेटघाट गर्दै प्रतिनिधिसभाको मिति तोकेर आह्वान समेत भइसकेको अवस्थामा फेरि कुनै सूचना नदिइकन बैठक स्थगित गरिएकोमा टिप्पणी गरेका हुन् ।
उनले भने, ‘सरकारले अहिले संसद् र नागरिक दुवैलाई हेपेको छ,’ ‘सरकारलाई बहुमत प्राप्त सदनप्रति नै विश्वास छैन रहेछ ।’ ‘बहुमत प्राप्त सरकारको संसद्प्रति नै विश्वास छैन । संसद् छलेर अध्यादेश ल्याउने सवालमा नागरिकलाई केही पनि बताउनैनपर्ने, केही भन्नै नपर्ने ? संसद्को तयारी नभएको र सांसदकै अनुरोधमा बैठक स्थगित गरेको हो भनेर प्रचार भयो, यो सरासर हेपेको र ढाँटेको हो ।’ ‘हामी यसरी गर्दैछौं । हामी यसरी अघि बढ्दैछौं भनेर प्रतिपक्षमा भएको नाताले हामीसित एक पटक पनि किन नसोधेको ?,’ ‘हामी आफैं पनि सुधारको पक्षमा छौं । हामी पनि विगतका कमी–कमजोरी सच्याउँछौं भनेर चुनावमा गएका हौं । संवैधानिक निकायको नियुक्तिका सवालमा व्यापक परिवर्तन गर्छौं भन्नेमा थियौं ।’
