काठमाडौँ, १६ बैशाख । सरकारले पुनः यातायात भाडा बढाएको छ ।
यातायात व्यवस्था विभागले अन्तर प्रदेश सार्वजनिक यातायातका तथा मालवाहक सवारीसाधनको भाडादर समायोजन गरेको हो । यातायात व्यवस्था विभागका निर्देशक मणि भुसालका अनुसार हिजो मन्त्रीस्तरको निर्णयले सार्वजनिक यातायातमा ५ प्रतिशत भाडा वृद्धि गरिएको हाे ।
अन्तर प्रदेश सार्वजनिक सवारीसाधनको भाडा समायोजन गर्दा आधार मानिएको इन्धनको बजार मूल्य पाँच प्रतिशत वा सोभन्दा बढीले बढेमा वा घटेमा विभागले अभ्यास गर्दै आएको छ ।
वैज्ञानिक भाडा समायोजन प्रणालीअनुसार स्वचालित रूपमा अन्तर प्रदेश सार्वजनिक यातायातको भाडा बढ्ने वा घट्ने व्यवस्था अनुरुप पछिल्लो पटक भाडादर समायोजन गर्दा भएको डिजेलको औसत मूल्य प्रतिलिटर १८० रुपैयाँ ८३ पैसा हुँदा वैशाख ३ गते बढाएको थियो । नयाँ भाडादरअनुसार यात्रुवाहक सवारी, पहाडी बाटोमा सञ्चालन हुने मालवाहक सवारी तथा तराईमा सञ्चालन हुन मालवाहक सवारीमा पाँच प्रतिशत वृद्धि गरेको जनाएको छ ।
