काठमाडौँ, १५ बैशाख । जिल्ला प्रहरी परिसर भक्तपुरले ठूलो परिमाणको अवैध लागूऔषधसहित एक युवकलाई नियन्त्रणमा लिएको छ ।
हिजो साँझ प्रहरी प्रभाग ब्यासीबाट खटिएको प्रहरी टोलीले सूर्यविनायक नगरपालिका–५ सल्लाघारीस्थित सडक खण्डमा चेकजाँच गर्ने क्रममा उनलाई पक्राउ गरेको हो ।
पक्राउ पर्नेमा सिन्धुली जिल्लाको हरिहरपुर गाउँपालिका– ८ घर भई हाल भक्तपुरको दार्जिलिङ हाइट बस्ने ३० वर्षीय प्रकाश पाख्रिन रहेका छन् ।
पाख्रिनले चलाएको बा.प्र.०२-०६४ प ४९८५ नम्बरको स्कुटरलाई रोकेर खानतलासी गर्दा लुकाईछिपाई ल्याएको अवस्थामा ठूलो परिमाणमा लागूऔषध बरामद भएको थियो ।
बरामद गरिएका सामग्रीहरू
१, डाइजोपाम – १०३ एम्पुल
२, नोर्फिन – १०३ एम्पुल
३, फेनेरागन – १०३ एम्पुल
४, ट्रामाडोल – ८५० ट्याब्लेट
५, नाइट्राभेट – २१० ट्याब्लेट
६, नेपाली नगद – २८,२५० रुपैयाँ
पक्राउ परेका पाख्रिन र उनले प्रयोग गरेको स्कुटरलाई नियन्त्रणमा लिएर थप अनुसन्धान कार्य अगाडि बढाइएको प्रहरीले जनाएको छ ।
