एजेन्सी, १९ असोज । पाकिस्तानको प्रमुख विपक्षी दल पाकिस्तान तहरिक–ए–इन्साफले (पीटीआईले) पार्टीका नेता तथा पूर्वप्रधानमन्त्री इमरान खानको रिहाइका लागि लङ मार्च सुरु गरेको छ ।
पार्टीको आह्वानमा खैबर पख्तुनख्वा प्रान्तको लक्की मरवत जिल्लास्थित गुन्डी चोक राजनीतिक गतिविधिको मुख्य केन्द्र बनेको बताइएको छ । बलुचिस्तान र प्रान्तका दक्षिणी क्षेत्रहरूबाट पीटीआईका काफिला आइपुगिरहेका छन् । आइतबारबाट सुरु भएको यो लङ मार्च राजधानी इस्लामाबादसम्म पुग्नेछ ।
यद्यपि, पाकिस्तानका गृहमन्त्री मोहसिन नक्वीले चेतावनी दिँदै कुनै पनि समूहलाई इस्लामाबादमा प्रवेश गर्न नदिइने बताएका छन् । अदालतको आदेश उल्लंघन गर्ने पीटीआई नेताहरूमाथि कानुनी कारबाही गरिने पनि उनले स्पष्ट पारे ।
यस लङ मार्चको नेतृत्व खैबर पख्तुनख्वाका मुख्यमन्त्री सुहेल अफ्रिदीले गरेका छन् । इमरान खानको रिहाइको माग राख्दै यो मार्च गत महिना नै निकाल्ने तय भएको थियो । त्यसपछि सरकार र पीटीआईबीच भएका वार्ताका चरणहरू असफल भएका थिए ।
बीबीसी न्युज उर्दूका अनुसार, मरवत जिल्ला प्रशासनले डेरा इस्माइल खान डिभिजनका चार जिल्लामा शान्ति भंग हुन नदिने आदेश गरेको छ । यसका बाबजुद पीटीआई समर्थकहरू मार्चमा सहभागी हुन अघि बढिरहेका छन् ।
गृहमन्त्री नक्वी पेसावर पुगेर चेतावनी
लङ मार्च चलिरहेकै समयमा गृहमन्त्री मोहसिन नक्वी पेसावर पुगेर गभर्नरसँग भेट गरेको थिए । गृहमन्त्री नक्वीले सरकार र पीटीआईबीचको वार्ता सकिसकेको घोषणा गरेलगत्तै यो घटनाक्रम विकसित भएको हो ।
लाहोरमा आयोजित पत्रकार सम्मेलनमा मोहसिन नक्वीले चेतावनी दिँदै मार्चका क्रममा कसैको ज्यान गएमा त्यसको सम्पूर्ण जिम्मेवारी मुख्यमन्त्री सुहेल अफ्रिदीले लिनुपर्ने बताए ।
अर्कोतर्फ, पीटीआईका महासचिव सलमान अकरम राजाले भने वार्ता असफल हुनुको मुख्य कारण सरकारले खैबर पख्तुनख्वा प्रान्तीय सरकारलाई प्रान्तभित्र सञ्चालित आतंकवाद–विरोधी अभियान र कदमहरूमा समर्थन गर्न बाध्य पार्न खोज्नु रहेको दाबी गरेका छन् । बीबीसी
