रौतहट, २३ असार । गरुडा नगरपालिका–५ झाझपुलमा गरुडा नगरपालिका–९ गम्हरिया बिर्ताका ४२ वर्षीय सदरे आलम कटुवा पेस्तोलसहित पक्राउ परेका छन् ।
गौतम सहनीले सञ्चालन गरेको मदिरा पसलमा उनको शरीर खानतलासी गर्दा कमरमा भिरेको अवस्थामा एक राउण्ड गोली लोड रहेको कटुवा पेस्तोल फेला परेको हो । उनले मदिरा पसलको पछाडिको खेतमा रहेको झ्याङमा गोली तथा नगद रुपैयाँ लुकाईछिपाई राखेको पनि पाइएको छ ।
उनका साथबाट कटुवा पेस्तोलमा प्रयोग हुने लाइभ राउण्ड गोली ४ थान, ब्ल्याङ्क राउण्ड १ थान, कालो रङको पर्सभित्र भारतीय रुपैयाँ २४ हजार पाँच सय, नेपाली रुपैयाँ ३२ हजार पाँच सय तथा नाइट्राभेट ट्याबलेट २ पिस बरामद भएको छ ।
