काठमाडौँ, ३० जेठ । पशुपतिनाथ मन्दिर परिसरमा युवकको हत्या गरेर भागेका एक जना साधुलाई प्रहरीले पक्राउ गरेको छ । पक्राउ पर्नेमा द्रव्यनाथ भन्ने सुबिन रानामगर छन् ।
प्रहरीका अनुसार आरोपी मन्दिर परिसरमा २०८२ फागुन ६ मा सङ्खुवासभा घर भएका २५ वर्षीय सन्तोष गिरीको हत्यामा संलग्न रहेको अनुसन्धान निष्कर्ष छ । उनलाई शुक्रबार महोत्तरीको गौशाला नगरपालिका–६ बाट पक्राउ गरेर काठमाडौँ ल्याइएको हो ।
सन्तोष गिरी भन्ने सन्तोष परियार काठमाडौँ महानगरपालिका–८ पशुपति मन्दिर परिसरको १५ नम्बर शिवालयमा मृत अवस्थामा भेटिएका थिए । चिम्टा र बाँसको चिर्पटले प्रहार गरेर उनको हत्या गरिएको प्रहरीको अनुसन्धान निष्कर्ष छ । महाशिवरात्रिको मेलामा पशुपति पुगेका भारतीय साधु निरजनाथ समेतको समूहसँग वादविवाद हुँदा समूह मिलेर उनलाई चिम्टा लगायतका बस्तुले प्रहार गरेर हत्या गरेको प्रहरीको प्रारम्भिक अनुसन्धानबाट थाहा भएको छ ।
हत्यामा संलग्न आशंकामा यसअघि प्रहरीले भारतको उत्तर प्रदेश मथुरा घर भएका ४८ वर्षीय नीरज नाथ र दोलखा बैतेश्वर गाउँपालिका घर भएका २३ वर्षीय आशीर्वाद नाथ योगी भन्ने सरोज तामाङलाई पक्राउ गरेर अनुसन्धान गरेको थियो ।
फागुन ५ मा गिरीको हत्या गरेपछि मुख्य आरोपी द्रव्यनाथ चाहिँ बल्खु हुँदै भारततर्फ लागेको अनुसन्धानमा संलग्न प्रहरी अधिकृतहरू बताउँछन् ।
