म्याग्दी, २७ जेठ । म्याग्दीको रघुगङ्गा गाउँपालिकास्थित जङ्गलमा लुकाएर राखिएको अवस्थामा प्रहरीले ठुलो परिमाणमा अवैध हतियार बरामद गरेको छ ।
जिल्ला प्रहरी कार्यालय म्याग्दी मातहतको अस्थायी प्रहरी पोष्ट चिमखोलाबाट खटिएको विशेष प्रहरी टोलीले आज आठ थान अवैध एक नाले भरुवा बन्दुक बरामद गरेको हो ।
प्रहरीका अनुसार म्याग्दीको रघुगङ्गा गाउँपालिका वडा नं. ७ मा पर्ने फेदिवनस्थित जङ्गलमा ईजाजत पत्र नभएका भरुवा बन्दुकहरू लुकाई–छिपाई राखेको अवस्थामा फेला परेका हुन् । जङ्गलमा शङ्कास्पद रूपमा हतियार राखिएको सूचनाका आधारमा पुगेको प्रहरी टोलीले ती बन्दुकहरू रितपूर्वक नियन्त्रणमा लिएको हो । बरामद गरिएका सबै हतियारहरूलाई अहिले अस्थायी प्रहरी पोष्ट चिमखोलामा सुरक्षित राखिएको छ ।
अवैध हतियार नियन्त्रण गर्ने प्रहरीको अभियान अन्तर्गत यो सफलता मिलेको हो ।
