काठमाडौँ, १९ जेठ । ललितपुरको कुपण्डोलस्थित एक घरबाट ल्यापटप र नगद चोरी गरेको आरोपमा प्रहरीले तीन जनालाई पक्राउ गरेको छ।
कुपण्डोलको गणेश मन्दिर नजिकै रहेको घरबाट दुई थान ल्यापटप र नगद चोरी भएको सूचना पाएपछि खोजीमा जुटेको प्रहरी टोलीले चोरीमा संलग्न उनीहरूलाई बरामद सामानसहित नियन्त्रणमा लिएको हो ।
पक्राउ पर्नेहरूमा सिन्धुलीको कमलामाई नगरपालिका वडा नं. १० घर भई हाल ललितपुर महानगरपालिका वडा नं. १ बस्ने २१ वर्षीय अमन परियार र नुवाकोटको विदुर नगरपालिका वडा नं. २ घर भई हाल काठमाडौँको थापाथली बस्ने १७ वर्षीय नजर थापा मगर छन् ।
प्रहरीले चोरीको ल्यापटप खरिद गर्ने कार्यमा संलग्न महोत्तरीको जलेश्वर नगरपालिका वडा नं. १ घर भई हाल थापाथली बस्ने २१ वर्षीय रञ्जन कापरलाई पनि पक्राउ गरेको छ । गएको जेठ १४ गते चोरी भएको उजुरी परेपछि प्रहरीले तत्परता देखाउँदै उनीहरूलाई समातेको हो । पक्राउ परेका व्यक्तिहरूको साथबाट प्रहरीले एक थान एचपी कम्पनीको र एक थान डेल कम्पनीको ल्यापटप बरामद गरेको छ । नियन्त्रणमा लिइएका तीनै जनामाथि प्रहरीले हिरासतमा राखेर थप अनुसन्धान अघि बढाएको छ ।
