काठमाडौँ, २९ भदौ । कर्णाली प्रदेशका मुख्यमन्त्री यामलाल कँडेलले जेनजी आन्दोलनलाई प्रयोग गरी केही व्यक्ति तथा समूहले प्रतिशोध साध्ने काम गरेको आरोप लगाएका छन् ।
आज मुख्यमन्त्री तथा मन्त्रिपरिषद्को कार्यालयमा आयोजित पत्रकार सम्मेलनमा उनले जेनजीका नाममा वितण्डा मच्चाइँदा निजी तथा सरकारी निवाससहित सवारीसाधनहरूमा क्षति पुगेको जानकारी दिए ।
आन्दोलनकारीहरूलाई वास्तविक उद्देश्य थाहा नभए पनि व्यावसायिक लाभका लागि केही तत्त्व सक्रिय देखिएको उनले दाबी गरे ।
उनले जेनजी आन्दोलनका मागमध्ये सुशासन र भ्रष्टाचारविरुद्धका आवाज समर्थनयोग्य भए पनि तोडफोड, आगजनी र हिंसा निन्दनीय भएको बताए । ‘कतिपय अनुकरणीय कुरा छन्, तर त्यसका नाममा वितण्डा गर्नु गलत हो,’ उनले भने ।
