काठमाडौँ, ९ भदौ । काठमाडौँको नयाँ बानेश्वरमा ड्युटीमा खटिएकी प्रहरी जवानलाई आक्रमण गर्ने एकजना युवकलाई प्रहरीले पक्राउ गरेको छ ।
आज बिहान काठमाडौँ–१० स्थित पुरानो संसद भवन नजिकै जुम्लाको तातोपानी घर भएका २७ वर्षीय युवकले एकजना महिला प्रहरी कर्मचारीलाई आक्रमण गरेका हुन् ।
आक्रमणमा संलग्न राज कठायतलाई पक्राउ गरिएको हो । आकाशेपुलबाट बाटो काट्न आग्रह गर्दा कठायतले महिला प्रहरीसँग विवाद गर्दै आक्रमण गरेका हुन् ।
ड्युटीमा खटिएकी महिला प्रहरीले आकाशे पुल नजिकै भएको भन्दै ‘जहाँ पायो त्यहिँबाट बाटो काट्दा दुर्घटना हुन्छ, आकाशे पुलबाट जानुस्’ भनेपछि युवकले एक्कासि आक्रमण गरेको उपत्यका ट्राफिक प्रहरी कार्यालयले जनाएको छ । पिक आवरको ड्युटीमा खटिएका ट्राफिक प्रहरीको सहयोगमा उनलाई नियन्त्रणमा लिइएको छ ।
घटनाबारे प्रहरी वृत्त नयाँ बानेश्वरले अनुसन्धान गरिरहेको छ ।
