काठमाडौँ, २७ जेठ । काठमाडौँ महानगरपालिकाकी उपप्रमुख सुनिता डङ्गोलले काठमाडौँ जिल्ला कमिटीको सातौँ अधिवेशनबाट छनोट हुने नयाँ नेतृत्वका लागि कुनै पनि पदमा आफ्नो दाबी नरहने बताएकी छन् ।
आज एक विज्ञप्ति जारी गर्दै डङ्गोलले सातौँ अधिवेशनबाट छनोट हुने नयाँ नेतृत्वका लागि कुनै पनि पदमा आफ्नो दाबी नरहने बताएकी हुन् ।
‘नेकपा (एमाले) काठमाडौँ जिल्ला कमिटीको सातौँ अधिवेशनको अहिले बन्द सत्र चलिरहेको छ । ५ सय ८५ प्रतिनिधिको उपस्थिति रहेको उक्त अधिवेशनले नयाँ नेतृत्व छनोट गर्दै सम्पन्न हुनेछ’, ‘बन्द सत्र चलेसँगै नयाँ नेतृत्व छनोटको समेत प्रक्रिया चलिरहेका बेला विभिन्न सञ्चारमाध्ययमहरुले काठमाडौँ जिल्ला कमिटीको नयाँ नेतृत्वका लागि मेरो पनि दाबी रहेको भन्दै समाचार प्रकाश तथा प्रसारण गरेको जानकारी प्राप्त भयो ।’ ‘म स्वयम्को जानकारी विना प्रकाशित समाचारहरू सत्य नभएको पनि स्मरण गराउन चाहन्छु,’ डङ्गोलले विज्ञप्तिमा भनेकी छन् ।
