काठमाडौँ, १९ असार । नेपाल निम्न आय (लो इन्कम) भएको मुलुकबाट निम्नमध्यम आय (लोअर मिडल इन्कम) भएको मुलुकको सूचीमा उक्लिएको छ ।
विश्व बैंकले देशहरुको आयमा आधारित वर्गीकरण फेबदल भएका १० देशको सूची सार्वजनिक गरेकोमा नेपाल स्तरोन्नति भएकाहरूको सूचीमा परेको हो ।
नयाँ वर्गीकरणअनुसार नेपाल मध्यम आय भएको मुलुक बनेको छ । सार्वजनिक विवरणअनुसार नेपालको प्रतिव्यक्ति कुल राष्ट्रिय आय १ हजार ९० डलर छ । यो गत वर्षको जुलाइ १ तारिखको भन्दा १ सय ३० डलर बढी हो । सन् २०१९ मा नेपालीहरुको प्रतिव्यक्ति आय ९६० अमेरिकी डलर थियो ।
विश्व बैंकको वर्गीकरणमा १ हजार ३६ डलरभन्दा बढी प्रतिव्यक्ति आय भएका देश निम्नमध्यम आय वर्गमा पर्छन् । विश्व बैंकका अनुसार नेपालसहित तान्जिनिया र बेनिन यो वर्गमा उक्लिएका छन् ।
