कपिलवस्तु, २५ साउन । बुद्ध जन्मस्थल लुम्बिनीको पवित्रता र अध्यात्मिकता फैलाउन भगवान बुद्धको जीवनी र उपदेश पुस्तक प्रकाशन गरिएको छ ।
भगवान गौतम बुद्धलाई नजिकबाट जानेर शान्ति, करुणा, मैंत्री र भातृत्व जगाई जीवन र जगतलाई सार्थक बनाउन पुस्तक बाहिर ल्याइएको हो । उक्त पुस्तक अखिल नेपाल भिक्षु महासंघ अध्यक्ष भिक्षु मैंत्री महास्थवीर र प्रदेशसभा सदस्य फकरुद्दिन खानले विमोचन गरेका थिए ।
पुस्तक लुम्बिनी आउने सबैलाई निःशुल्क वितरण गरिनेछ । मायादेवी मन्दिरको प्रमुख प्रवेश द्वार शान्ति द्विप निर स्टल राखेर दैनिक विहानदेखि साझसम्म वितरण गरिनेछ । पुस्तक नेपाली भाषामा छ । ६ महिनापछि चिनिया र अंग्रेजी भाषामा प्रकाशन गरिने छ ।
७० पेजको पुस्तकमा राजकुमार सिद्धार्थको जन्म, वाल्यकाल र विवाहको प्रशंग छन् । त्यस्तै गृह त्याग, ज्ञानको खोजी र बुद्धत्व प्राप्तिका कुरा उल्लेख गरिएकोछ । त्यस्तै बुद्धको धर्मदेशना, कपिलवस्तु आगमन र महापरिनिर्वाणका घटनापनि पुस्तकमा संलग्न छन् ।
