काठमाडौँ, २३ असोज । बैंकिङ कसुर मुद्दामा ४ करोड रुपैयाँ बिगो ठहर भई फरार रहेका एक प्रतिवादीलाई नेपाल प्रहरीको केन्द्रीय अनुसन्धान ब्युरो (सीआईबी) ले पक्राउ गरेको छ ।
पक्राउ पर्नेमा भक्तपुरको चाँगुनारायण नगरपालिका वडा नं. ३ (साविक झौखेल गाविस) का ६३ वर्षीय दिपक चन्द्र न्यौपाने रहेका छन् । राधा पाण्डेयको जाहेरीमा उक्त बैंकिङ कसुर मुद्दामा झापा जिल्ला अदालतले २०८१ वैशाख ७ गते फैसला सुनाउँदै न्यौपानेलाई ४ करोड रुपैयाँ बिगो, बिगो बमोजिमको जरिवाना र १ महिना १५ दिन कैद सजाय ठहर गरेको थियो ।
अदालतको फैसलापछि सजाय बेरुजु राखी फरार रहेका न्यौपाने काठमाडौँ उपत्यकाका विभिन्न स्थानहरूमा लुकिछिपी बस्दै आएका थिए। विशेष गोप्य सूचनाका आधारमा सीआईबीबाट खटिएको प्रहरी टोलीले उनलाई भक्तपुर नगरपालिका वडा नं. १ स्थित सृजनाटोलबाट पक्राउ गरेको हो ।
पक्राउ परेका न्यौपानेलाई फैसला कार्यान्वयनका लागि भक्तपुर जिल्ला अदालतमा पेश गरिएको हो ।
