काठमाडौँ, वैशाख । सर्जक पुष्पलता आचार्यको बैसठ्ठीऔं कृति ‘आफ्नै संसार’ उपन्यास लोकार्पण गरिएको छ ।
सोमवार राजधानीमा आयोजित कार्यक्रममा उपस्थित पाठक–स्रोताले उक्त कृति सम्वन्धी गरिएको प्रश्नबाट नौलो शैलीमा उहाँको कृतिको लोकार्पण गरिएको हो ।
वि.स. २०५१ मा सागर सन्ध्या आधुनिक गीतसङ्ग्रह स्रोतामाझ ल्याएदेखि हालसम्म उहाँका कथा सङ्ग्रह, गीतिकथा, संस्मरण, भजन, बालचित्र कथा, कविता सङ्ग्रह,उपन्यास, आधुनिक गीतसङ्ग्रहलगायत आफ्नै संसार उपन्यासहित बैसठ्ठी औं कृति बजारमा आएका छन् ।
कार्यक्रममा साहित्यकार एवं भ्रष्ट्राचार विरोधी कालो सुर्य अभियानका अभियन्ता भरत जङ्गमले सर्जक आचार्य निरन्तर कलम चलाउने साहित्यकार हुन्, भन्दै आफ्नै संसार उपन्यासमा यथार्थ र काल्पनीक विषय ५०/५० प्रतिशत नै रहेको बताउनुभयो ।
त्यसैगरी शैलेन्द्र साकारले स्रष्टा आचार्यले आफ्नो उमेरभन्दा पनि बढि कृति दिएर समाजका लागि योगदान दिनुभएको बताउनुभयो । साथै आफ्नै संसार उपन्यासलाई कथानक बनाउन पात्रमार्फत ज्यादै रोचक विषय पस्कन सफल भएको बताउनुभयो ।
चितवनको मुग्लिनमा स्कार्पियो गाडी ठोक्किएपछि सुरू भएको उपन्यास आखिरमा आध्यात्मतिर गएर टुङ्गिन्छ । त्यसबीच पाठकको ध्यानलाई खिचिरहन सक्ने गरी अहिलेको पुस्ताले मन पराउने रोमाञ्चकारी विषय समावेश गरिएको सर्जक आचार्यले बताउनुभयो । उहाँ भ्रमण गर्न औधि रूचाउनुहुन्छ । हालसम्म विश्वका १२ देशलगायत नेपालका धेरै स्थान पुग्दा आफुले लेख्ने विषय पनि भ्रमणकै अवसरमा पाउने अनुभव सुनाउनुभयो ।
एकल महिलाका लागि रातो अभियान चलाउनुहुने स्रष्ट्रा आचार्य पुस्तकालय, प्रतिक्षालय निर्माणका लागि सहयोग, गाउँसमाजका महिलाको जीवनस्तर उकास्न महिला समुहका लागि सहयोगका साथै समाजसेवामा पनि निरन्तर लागिरहने व्यक्तित्व हुनुहुन्छ ।
साहित्यका साथै गीतसङ्गीत, भजनलगायतका क्षेत्रमा कलम चलाउँदै आउनुभएको छ भने थुपै्र सामाजिक सङ्घ संस्थामा रहेर काम गरिरहनुभएको छ । उहाँको क्षितिजपारी,वरको छायाँले, ताननसेन घमाईलोलगायत ३१ वटा गीति एल्वम, गंगा नेपाली, बज्रपात चलचित्र निर्माण पनि गर्नुभएको छ ।
Photo : Pratik Karki
