तिमी ब्राजिल भन्छौ म अर्जेन्टिना …
यो फुटबलको मन्सुने महिना, विमति यहीँ छ !
तिमी ब्राजिल भन्छौ म अर्जेन्टिना,
विमति यहीँ छ !
नेताजति सबै मिडियाबाजीमै रमाएको देख्छु,
कुरा ठूला काम झिना-मसिना, विमति यहीँ छ !
रसिलो अङ्गुर खान आएकालाई छुर्पी देखाउँछौ,
कताको तेल कताको सुख्खा पिना, विमति यहीँ छ !
सुर न तालका मान्छेहरू बेतुके सहकार्यमा छन्,
सर्पलाई डम्मरु बाँदरलाई बिना, विमति यहीँ छ !
बोक्रे प्रेमी पनि मायालाई गीत भन्छन्, सङ्गीत भन्छन्,
दिल्लगीमा दिलको ता-का धि-ना, विमति यहीँ छ !
भाग्य बुझिन्न, कर्म गरिन्न र पनि माया फलाकेर हैरान्,
दिलको हिसाब अनि हिनामिना, विमति यहीँ छ !
भइगो…फेरि आफ्नै कुरामा आउँन त…
भन्दा पनि,
न साम्राज्ञी पर्यौ …तिमी …
न मेलिना, विमति यहीँ छ !
नारायण नेपाल
कपन
