काठमाडौँ, १४ कार्तिक । अविरल वर्षाका कारण नेपाल प्रिमियर लिग (एनपीएल)को तेस्रो सिजनमा साबिक विजेता लुम्बिनी लायन्स र चितवन राइनोजबीचको खेल रद्द भएको छ ।
आज नेपाल क्रिकेट संघ (क्यान)ले वर्षाका कारण यी दुई टिमबीचको खेल रद्द भएको जनाएको हो । खेल रद्द भएपछि दुवै टिमले एक/एक अंक बाँडेका हुन् । अब दुवै टिमको समान तीन अंक भएको छ ।
तालिकामा लुम्बिनी र चितवन समान तीन अंकका साथ दोस्रो र तेस्रो स्थानमा छन् । लुम्बिनीले कात्तिक ९ गते भएको उद्घाटन खेलमा सुदूरपश्चिम रोयल्सलाई सात विकेटले हराएको थियो ।
चितवनले भने विराटनगर किंग्सलाई आठ रनले पराजित गरेको थियो । चितवन रन रेटमा पछाडि पर्दा तालिकाको तेस्रो स्थानमा छ । वर्षाका कारण आजको दोस्रो खेल पनि प्रभावित हुने सम्भावना छ । यस दिन बेलुका ५ बजे सुदूरपश्चिम रोयल्स र विराटनगर किंग्सले प्रतिस्पर्धा गर्ने तालिका छ ।
