काठमाडौँ, ९ असोज । मकवानपुरको बकैया गाउँपालिका वडा नम्बर ११ र मकवानपुरगढी गाउँपालिका वडा नम्बर १ को सिमानामा पर्ने सिमात खोलामा आएको बाढीले बगाएर एक पुरुषको मृत्यु भएको छ ।
जिल्ला प्रहरी कार्यालय मकवानपुरका अनुसार मकवानपुरगढी गाउँपालिका वडा नम्बर १ बस्ने ५० वर्षका श्यामबहादुर स्याङतानको मृत्यु भएको हो ।
बकैया गाउँपालिका वडा नम्बर ११ बाट हिजो दिउँसो ५ बजे घरतर्फ फर्किने क्रममा स्याङतानलाई सिमात खोलाको बाढीले बगाएको थियो । सिमात खोलाको बीचको ढुंगामा अड्किएको अवस्थामा उनको शव फेला परेको हो ।
स्याङतानको शव पोस्टमार्टमका लागि हेटौंडा अस्पताल ल्याइएको र घटनाबारे थप अनुसन्धान भइरहेको प्रहरीले जनाएको छ ।
