काठमाडौँ, १६ असार । सभामुख डीपी अर्यालले देश बनाउने हुटहुटीमा कार्यपालिका, न्यायपालिका र व्यवस्थापिकाको स्पिड र स्पिरिट मिल्नुपर्ने बताएका छन् ।
आज काठमाडौँमा आयोजित एक कार्यक्रममा बोल्दै अघिल्लो पुस्ताको अनुभव र पछिल्लो पुस्ताले प्राप्त गरेको ज्ञानलाई लिएर अघि बढ्नुपर्ने बताए।
उनले भने, ‘देश फास्ट ट्र्याकमा बनाउनुपर्छ, देश समृद्ध बनाउनुपर्छ, जनताको जनजीविकाको विषयमा काम गर्नुपर्छ भन्ने हुटहुटीलाई सँगै लिएर जानको लागि हामीसँग भएको तीनवटा निकाय कार्यपालिका, न्यायपालिका र व्यवस्थापिकाको स्पिड र स्पिरिट मिल्नुपर्छ। यसमा संविधानलाई अक्षरशः पालना गरेर अहिले भएको संविधानमा कहीँ कतै हामी कानुनी राज्यको परिकल्पना गरेका छौँ।’
कानुनी राज्यमा कहीँ कतै अप्ठ्यारो नपर्ने गरी अगाडि बढ्नुपर्छ भन्ने कुरामा दुई मत नरहेको बताए । उनले भने, ‘आगामी दिनमा जनजीविकाको, राष्ट्रियताको, राष्ट्र निर्माणको, समृद्ध राष्ट्र बनाउने, सुशासन कायम गर्ने, भ्रष्टाचारको अन्त्य गरेर नेपाल बस्न लायक भयो, अब फर्किनुपर्छ भन्ने वातावरण बनाउन हामीलाई झकझकाइरहनुपर्छ।’
