पोखरा,२५ मङसिर । नेपाल कम्युनिष्ट पार्टी९नेकपा०का अध्यक्ष पुष्पकमल दाहाल (प्रचण्ड)ले आगामी मङ्सिर २९ गतेको स्थायी समितिको बैठकले जिल्ला एवं भातृ सङ्गठनको नेतृत्व चयन गर्ने बताउनुभएको छ ।
कास्कीको पर्यटकीय गाउँ सिक्लेसमा आयोजित पत्रकार भेटघाट कार्यक्रममा बोल्दै अध्यक्ष प्रचण्डले वर्तमान सरकारको विकल्प नरहेको बताउनुभयो । उहाँले वर्तमान सरकार देश र जनतामा समर्पित रहेको भन्दै आफ्नो चुनावी घोषणा पत्र अनुसार नै सरकारले कार्य अघि बढाएको र बाँकी केही योजना आगामी बर्षदेखि कार्यान्वयनमा ल्याउने समेत बताउनुभयो ।
उहाँले सामाजिक सुरक्षा, विकास निर्माण लगायतमा व्यक्त चासोलाई सम्बोधन गर्ने गरी अघि बढिने उल्लेख गर्नुभयो । सिक्लेसबाटै शान्ति प्रकृयाको शुरुआत भएको स्मरण गर्दै उहाँले पोखराबाट सिक्लेस जोड्ने बाटोलाई पक्की बनाउन पहल गरिने प्रतिबद्धता समेत जनाउनुभयो ।
