काठमाडौँ, ३ माघ । ‘केपी ओली कप फुटबल प्रतियोगिता’ को दोस्रो संस्करण आगामी फागुनमा आयोजना हुने भएको छ ।
प्रतियोगिताको आयोजक राष्ट्रिय युवा संघ नेपालले बुधबार पत्रकारसम्मेलनमार्फत प्रतियोगिता फागुन ११ देखि १९ गतेसम्म सञ्चालन हुने जानकारी दिएको हो । प्रतियोगिताको फाइनलवाहेकका खेलहरु च्यालस मैदानमा खेलाइने छ । प्रतियोगिताको फाइनल खेल भने त्रिपुरेश्वरस्थित दशरथ रंगशालामा खेलाइने आयोजकले जनाएको छ । प्रतियोगितामा नेपालको ‘ए’ डिभिजन क्लबका अतिरिक्त विदेश टोलीको समेत सहभागिता रहने छ ।
प्रतियोगितामा पहिलो स्थान हासिल गर्ने टोलीले ११ लाख रुपैयाँ नगद पुरस्कार प्रदान गरिने छ । दोस्रो हुने टोलीले पाँच लाख रुपैयाँ पुरस्कार हात पार्नेछ । प्रतियोगिताको सर्वोत्कृष्ट खेलाडीलाई पनि एक लाख रुपैयाँ नगद पुरस्कार प्रदान गरिने आयोजकले जनाएको छ । यसका अतिरिक्त हरेक खेलको विजेता टोलीले २५ हजार रुपैयाँ पुरस्कार प्राप्त गर्नेछ ।
