काठमाडौँ, २८ असोज । काठमाडौँ जिल्ला अदालत बबरमहलबाट पक्राउ पुर्जी जारी भई फरार रहेकी ठगी मुद्दाकी प्रतिवादी नितु ठाकुरलाई प्रहरीले पक्राउ गरेको छ।
काठमाडौँ उपत्यका अपराध अनुसन्धान कार्यालय टेकुबाट खटिएको प्रहरी टोलीले मंगलबार ललितपुर महानगरपालिका–२३ धापाखेलबाट उनलाई नियन्त्रणमा लिएको हो ।
सिरहाको लहान नगरपालिका–५ घर भई हाल ललितपुर महानगरपालिका–२३ धापाखेल बस्ने ४२ वर्षीया ठाकुर १५ लाख ७० हजार रुपैयाँ ठगी रकमको मुद्दामा फरार रहेकी थिइन् । सबिन तामाङको जाहेरीले वादी नेपाल सरकार भई चलाइएको उक्त कसुरमा पक्राउ परेकी उनलाई थप अनुसन्धान तथा आवश्यक कारबाहीका लागि जिल्ला प्रहरी परिसर भद्रकाली काठमाडौँ पठाइएको छ ।
अनुसन्धानका क्रममा उनमाथि अन्य बैंकिङ कसुरका मुद्दाहरू समेत रहेको खुलेको छ। जिल्ला प्रहरी परिसर काठमाडौँमा दर्ता भएको बैंकिङ कसुर मुद्दामा २१ लाख ९० हजार, १८ लाख ५० हजार र १ लाख ६० हजार गरी जम्मा ४२ लाख रुपैयाँ बिगोमा उनीविरुद्ध पक्राउ पुर्जी जारी भई फरार रहेकी थिइन् ।
