काठमाडौँ, २२ असाेज । काठमाडौँको जडीबुटीमा गोली प्रहार गरेर प्रहरीले नियन्त्रणमा लिएको लुटेरा समूहका नाइके आयन माझी २७ वटा डाँकाचोरी मुद्दामा संलग्न भएको भेटिएको छ ।
आज राति प्रहरीले काठमाडौँ–३२ स्थित जडीबुटी पुलमुनि गोली प्रहार गरेर २४ वर्षीय माझीलाई नियन्त्रणमा लिएको थियो । उनी सिन्धुलीको मरिण गाउँपालिका वडा नम्बर–५ का स्थानीय हुन् । चोरी र डकैतीको नेतृत्व गर्दै आएका आयन २७ वटा अपराधमा संलग्न रहेको भेटिएको जिल्ला प्रहरी परिसर काठमाडौँले जनाएको छ ।
काठमाडौँ प्रहरीले आज पत्रकार सम्मेलन गरेर घटनाबारे जानकारी गराएको छ । नियन्त्रणमा लिन खोज्दा प्रहरी सहायक हवल्दार डम्बर बहादुर श्रेष्ठलाई खुकुरी प्रहार गर्न खोजेपछि आयनलाई गोली प्रहार गर्नुपरेको अनुसन्धानमा संलग्न अधिकृत बताउँछन् ।
माझीलाई नियन्त्रणमा लिन खोज्दा सुरुमा २ राउण्ड हवाई फायर र त्यसपछि घुँडामुनि गोली प्रहार गरिएको एसएसपी घिमिरेले बताए । उनले भने, ‘माझीको दायाँ खुट्टाको घुँडामुनि १ राउण्ड गोली लागेको छ ।’
आयनको समूहका अरु दुई जनालाई पनि प्रहरीले पक्राउ गरेको छ । पक्राउ पर्नेमा मकवानपुरको बकैया गाउँपालिका घर भएर भक्तपुरको थिमी नगरपालिका–४ बस्ने राकेश थिङ र मनोज कुमार मोक्तान छन् ।
प्रहरीका अनुसार मोटरसाइकलमा चढेर उनीहरूले पैदल हिँडिरहेकाहरूको सुनको सिक्री लुटपाट गर्ने र विभिन्न ठाउँमा डाँकाचोरी गरेको भेटिएको छ । सो समूहले अहिलेसम्म १५ वाट मोटरसाइकल चोरेको भेटिएको थियो । सिक्री लुट्न हिँड्दा मनोज कुमार मोक्तानले मोटरसाइकल चलाउने र राकेश पछाडि बस्ने गरेका थिए । उनीहरूलाई आयनले कमाण्ड गर्ने गरेको प्रहरीको अनुसन्धानले देखाएको छ ।
